【腹部劇痛】變賣所有物業 司馬燕憂癌症復發 四日做兩次手術

【腹部劇痛】變賣所有物業 司馬燕憂癌症復發 四日做兩次手術

司馬燕自2012年底發現患上胃癌後，需動手術將整個胃切走，至今依然要食口服化療藥，令手腳都生斑，體重亦曾經急跌到得番66磅。

今日有周刊報道，指今年年初、剛去完荷蘭補舉行婚禮嘅司馬燕，旅行期間突然感腹部劇痛，返到香港隨即被送到手術室，四日內接受過兩次手術。司馬燕擔心自己癌病復發，後來發現只係尿管發現有纖維瘤，幸好及時發現，但手術都雖由尾龍骨開刀至到胸口，包括切除部份肋骨以及植入膠管。

據今日雜誌報道，司馬燕經歷咗割胃之後，只能坐喺度瞓覺，仲要忍受每晚都經歷痛醒嘅煎熬。雖然司馬燕已經成為醫院常客，但佢就話：「啲痛好似便利店，周圍都有，我算好彩，唔係執到心臟病。啲人食維他命幾十年，我咪當自己都食緊維他命。」可見佢依然保持樂觀心態去面對。

雖然飽受病魔折磨，但司馬燕依然能夠處之泰然，全靠屋企人同佢共渡患難、撐住佢。從司馬燕口中都聽得出囝囝係幾愛錫媽咪：「我好想食好多嘢，但始終冇咗個胃，食物直落，食太多、太少都會唔舒服會痛。囝囝氹我，話依家好多人都羨慕我唔肥又有model身材。」

今日不知明日事，司馬燕於訪問中透露，自己已經計劃好變賣物業：「如果要走，冇嘢可以帶走，我嘅物業唔留俾佢哋（囝囝），仲可以俾邊個。我只係覺得走嘅時候，做應做嘅事，我會將國內物業變賣，所有錢留俾佢哋，始終今日唔知聽日事。」

這個病，亦令司馬燕學會享受當下，珍惜每一分每一秒：「我當然希望睇到佢哋畢業、結婚、自己做奶奶，但唔到我去plan。不如依家實際啲，同佢哋share每分每秒。其實無論邊個人走咗，life都會go on，世界唔會因為我而停頓，所以我唔會去諗老公將來會唔會再識第二個女朋友，依家只要成個family齊全就夠。我覺得呢刻最重要係養好身體，爭取同自己愛嘅人一齊。」 

呢幾年嚟捱咗3次刀，司馬燕依然能夠處之泰然，全靠屋企人同佢共渡患難、撐住佢。	患病前嘅司馬燕	患癌後體重試過跌到落66磅
全家福	囝囝同老公嘅支持，係司馬燕最大生存動力。	老公今年年初帶咗司馬燕補婚禮，為佢帶嚟咗心靈上嘅滿足
司馬燕學會珍惜每秒：「不如依家實際啲，同佢哋share每分每秒，而家只要成個family齊全就夠。」	去年7月於荷蘭補舉行婚禮，蜜月旅行期間突然腹痛難忍。